சரித்திர நாவல்: வானவல்லி -1

ஈழம், யவனம், சாவகத் தீவு, பவளத்தீவு, பாண்டிய நாடு, சீனம், கடாரம்  போன்ற தேசங்களிலிருந்து வணிகர்களையும் கடலோடிகளையும் கவரும் மாபெரும் துறைமுக நகரமாக நாவலந்தீவினுள் அமைந்திருந்த மாபெரும் சோழப் பேரரசின் தலைநகராக விளங்கியது புகார்.

பல தேசத்து வணிகர்களும் கடலோடிகளும் தொடர்ந்து வந்துகொண்டும், போய்க்கொண்டும் இருந்ததனால் புகார் நகரில் இருந்த துறைமுகம் எப்போதும் பரபரப்புடனே இருந்து கொண்டிருந்தது.

 

துறைமுகத்திற்கு தூர தேசங்களிலிருந்து வந்து கொண்டிருந்த நாவாய்களுக்கு வழிகாட்ட நெய்யில் எரிந்துகொண்டிருந்த கலங்கரை விளக்கு, கடலலையின் உயரத்திற்கு ஏற்ப ஏறி இறங்கி விளையாடிக் கொண்டிருக்கும் படகு, நாவாய்கள் ஆகியவை கடலின் மீது நடனமாடிக் கொண்டிருந்தது.

கலங்கரை விளக்குடன் சேர்ந்துகொண்ட நிலவும் புகார் நகரக் கடலுக்குள் வெள்ளியை வாரி இறைத்துக்கொண்டிருப்பது போன்ற தோற்றத்தை அளித்தது.

வந்துகொண்டிருந்த நாவாய்களின் தூரத்து சிறு சிறு விளக்குகள் வானில் நட்சத்திரங்களுக்கு இணையாக கடலில் மின்னிக்கொண்டிருந்தது.

தூர தேசங்களில் இருந்து வந்துகொண்டிருந்த பெரும் வணிகக் கப்பல்களுக்கும், கடலோடிகளுக்கும் பாதுகாப்பை வழங்கிக்கொண்டிருந்த மணிமேகலைத் தெய்வத்தின் சிலை நெய்தனங்காவல் கடற்கரையில் வீற்றிருந்தது. அக்கோயிலில் எரிந்துகொண்டிருந்த சிறு விளக்கிலிருந்து வெளிப்பட்டுக் கொண்டிருந்த வெளிச்சமானது, பெருங்கடலுக்கே பாதுகாப்பையும், அருளையும் வழங்கிக் கொண்டிருப்பது போல சுடர் விட்டு எரிந்து கொண்டிருந்தது.

துறைமுகத்தில் வணிகர் கூட்டங்கள், அவர்களின் பணியாட்கள், அவர்களை முறைப்படுத்தியும், பாதுகாப்புக்காகவும் நின்றுகொண்டும் குதிரை மீதும் அமர்ந்திருந்த வாளேந்திய குதிரை வீரர்கள் அங்குமிங்கும் சென்று பார்வையிட்டுக் கொண்டு அனைவரையும் ஒழுங்குபடித்திக் கொண்டிருந்தனர்.

கப்பலிலிருந்து பாண்டிய நாட்டு முத்துக்கள், பொன், வெள்ளி, வைரம், கர்ப்பூரம், வாசனைக் குங்குமம், சீனத்து பட்டு, யவன தேசத்து நுண்ணிய வேலைப்பாடுகள் அமைந்த கலைப் பொருள்கள் போன்ற வாணிபப் பொருள்களை கப்பலிலிருந்து இறக்கிக்கொண்டும், ஏற்றிக்கொண்டும் துறை முகத்திலிருந்து பொருள்களை கூடை கூடையாக குதிரை வண்டியிலும், தங்கள் தலையில் சுமந்து கொண்டு சென்று கொண்டிருந்ததால் குதிரை வண்டியிலிருந்து வந்த சப்தமும் சுமை தெரியாமல் இருக்க பாடிக்கொண்டும் பேசிக்கொண்டும் வந்த பணியாளர்களின் சப்தமும் சேர்ந்துகொண்டு நகரம் சுறுசுறுப்புடன் இயங்கிக் கொண்டிந்தது.

சீனத்துக் கற்பூரம், வாசனைத் திரவியங்கள் துறைமுகம் முழுவதும் நறுமணத்தை பரப்பிக் கொண்டிருந்தது.

மாறாக உச்சிக்கு வந்துவிட்ட பூரண சந்திரன் தான் இரவு கடந்து நடு யாமம் வந்துவிட்டதை காட்டியதே தவிர நகரத்தில் நடு இரவு கடந்து கொண்டிருப்பதற்கான சுவடே இல்லை.

துறைமுகம் மட்டும் அல்லாமல் புகார் நகரமும் இப்படியே சுறுசுறுப்புடன் காணப்பட்டது.

வீதியில் எரிந்துகொண்டிருந்த இரவு விளக்குகளின் செந்நிற ஒளியோடு செந்துகொண்ட நிலவின் பாலொளி புகார் நகரத்திற்கு பேரழகை வழங்கிக்கொண்டிருந்தது.

இரவில் புகார் நகரத்திற்கு காவல் காக்கும் ஊர்ப்படை வீரர்கள் தங்களுக்குரிய உடையிலும் மாற்றுடையிலும் காவல் காத்துக்கொண்டிருந்த படியாலும் துறைமுகம் மற்றும் தூர தேசங்களிலிருந்து வந்திருந்த மக்களை பரிசோதித்து அவரரவர் இருப்பிடங்களுக்கு அனுப்பும் பணியிலும், வழியை காண்பித்துக்கொண்டும் வீரர்களின் கேள்விகள், பயணிகள் அளித்துக் கொண்டிருந்த பதில்கள் அவ்வப்போது எழும் குதிரைகளின் கனைப்பு சத்தம் முதலியவை துறைமுகத்தை விடவும் புகார் நகரம் பரபரப்புடன் இருந்தததை காட்டிக்கொண்டிருந்தது.

சோழப் பேரரசின் அரண்மனை, அமைச்சர்கள், செல்வந்தர்கள் இவர்களின் பல அடுக்கு மாட மாளிகைகள் அடங்கிய பட்டினப் பாக்கமும் மறவர்கள், சிறு வணிகர்கள் இவர்கள் வசிக்கும் மருவூர்ப் பாக்கமும் அந்தி விளக்குளால் பேரழகோடு விளங்கிக்கொண்டிருந்தது. இந்த இரண்டு ஊர்களும் சேர்ந்ததுதான் புகார் நகரம்.

இப்படி புகார் நகரமே பரபரப்பாகவும் கோலாகலமாக இருக்கக் காரணம் அடுத்தத் திங்களின் பவுர்ணமி நாளில் தொடங்கும் இந்திரத் திருவிழாதான்.

இந்திரத் திருவிழா அரச விழா என்பதால் சோழப் பேரரசின் தலைநகராகிய புகார் பொலிவோடு தயாராகிக் கொண்டிருந்தது. ஆதலால் எந்த வித அசம்பாவிதமும் இருக்கும் பொருட்டு காவல் மட்டும் பல மடங்கு அதிகப் படுத்தப் பட்டிருந்தது.

காவல் நகரத்தில் மட்டும் அல்லாது புகார் நகரத்தைச் சுற்றியுள்ள அடர்ந்த காடுகளிலும் நகருக்கு வரும் விருந்தினரை பாதுகாக்கும் பொருட்டு ஆங்காங்கே காவல்கள் நிறுத்தப் பட்டிருந்தது.

புகார் நகர மக்களும், அவர்களின் விருந்தினர்கள், விழாக்களுக்கு பலதரப்பட்ட தேசங்களில் இருந்து வரும் அலங்காரப் பொருள்களை வாங்குவதற்கும், அவல் நீச்சல் போட்டியில் தங்கள் திறமையைக் காண்பிக்கவும் தயாராகிக் கொண்டிருந்தனர் பெண்கள், மல்யுத்தம், இளவட்டக் கல் தூக்கும் போட்டி, வில் வித்தை, புரவிப் போட்டி ஆகியவற்றில் தங்கள் திறமையைக் கவனிக்க ஆடவர்களும் தயாராகிக்கொண்டிருந்தனர்.

இப்படி புகார் நகர மக்கள் அல்லாது நகரில் அமைந்துள்ள பலதரப்பட்ட சமயங்களான சைவம் (தமிழர் மதம்), ஆசீவகம், ஆருகதம் (சமணம்), பவுத்தம், வைதீகம் முதலிய சமய மக்களும் தயாராகிக் கொண்டிருந்தனர். இந்த சமயங்களின் பெரியோர்கள் சமய வாதம் புரிந்து ஒருவரொருவர் மற்றவர்களைத் தோற்கடிக்க தங்களைத் தயார்படுத்திக் கொண்டும் இருந்தனர்.

இந்தச் சமய மக்களோடு சிவன், கொற்றவை, திருமால், இந்திரன் முதலான தமிழர்களின் தெய்வங்களின் கோயில்களும் ஆருகத மதத்தின் ஆறுகதக் கடவுளின் மடங்களும், பவுத்தத்தின் ஏழு விகாரங்களை உள்ளடக்கிய இந்திராவிகாரமும், வைதீக பிராமணர்களின் விஷ்ணு, உருத்திரன், முதலிய தெய்வங்களும் வைதீக தெய்வங்களுக்கு நடத்தும் பிரமாண்ட யாகங்களுக்கு பலி கொடுக்க ஆயிரக்கணக்கான பசுக்களும் தயாராகிக் கொண்டிருந்தனர் இந்திரத் திருவிழாவிற்கு.

இப்படி புகார் நகரமே பரபரப்புடன் பெரும் மகிழ்ச்சியுடன் இருக்கும் போது புகார் நகரப் பெரும் வணிகன் வேளாதன் மட்டும் சற்றுக் கவலையுடன் பொழுது கடந்துகொண்டிருப்பதைக் குறிக்கும் உச்சி நிலவையும் வழியையும் பார்த்துக் கொண்டு ஏவலாளிகளுடன் இன்று வருவதாய்ச் சொன்ன தன் மகள் பத்திரை ஏன் இன்னும் வரவில்லை? செய்தி ஏதேனும் அவர்களைப் பற்றி வந்ததா என்று பணியாளர்களிடன் கோபத்தோடும் கவலையுடனும் கேள்விகளைக் கேட்டுக்கொண்டிருந்தான்.

நேரமாக நேரமாக பெருவணிகன் வேளாதனின் எதிர்பார்ப்பும், கவலையும் அதிகமாகிக் கொண்டே சென்றது. ஏனெனில் இன்று தன் உறவினர் நகரான ஆவூரிலிருந்து திரும்புவதாகக் கூறிய தன ஒரே மகள் பத்திரை கொடிய கள்வர்கள் நிரம்பிய சம்பாபதி பெருங்காட்டைக் கடந்துதான் வரவேண்டும் என்ற எண்ணம் மெதுவாக அவனைத் தின்றுகொண்டு பயத்தை அதிகப்படுத்திக் கொண்டிருந்தது. வனப் பாதையில் நின்றுகொண்டிருந்த சோழ வீரர்களின் காவலும், தன் மகளுடன் வரும் வானவல்லி மற்றும் சில காவலாளிகள் வருகிறார்கள் என்ற செய்தி மட்டுமே அவனுக்கு ஆறுதல் அளித்துக்கொண்டிருந்தது, சம்பாபதி வனத்தின் காவல் தெய்வமான சம்பாபதி அம்மனைத் தான் அவன் நம்பி வேண்டிக்கொண்டிருந்தான். இருப்பினும் அவனது கவலை நின்றபாடில்லை.

தொடரும்...

 

நன்பர்கள் அணைவருக்கும் வணக்கம். இனி வரும் ஒவ்வொரு புதனன்றும் வானவல்லி என்ற சரித்திர நாவல் வெளிவரும் என்பதை மகிழ்ச்சியுடன் தெரிவித்துக் கொள்கிறேன். எழுத்துப் பிழை, சொற்பிழை ஏதேனும் காணப்பட்டால் சுட்டிக் காட்டுமாறு கேட்டுக்கொள்கிறேன்.

நன்றி வணக்கம்...

சி.வெற்றிவேல்...

சாளையக்குறிச்சி...