பலாப் பழம் வாங்க போறீங்களா? இதை படிச்சிட்டுப் போங்களேன்!

சந்தைல பலாப்பழம் வாங்குவோம், பழம் பெருசா இருக்கும், கடைக் காரரும் நிறைய சுளை இருக்கும்னு சொல்லி வாங்க வச்சிடுவார். நாமளும் வீட்டுக்கு வந்து பழத்தை சாப்பிட்டு அடுத்த ஒரு வாரத்துக்கு பலாப் பழம் விற்ற அந்த பெரியவர திட்டிகிட்டு இருப்போம், ஏமாற்றுக் காரர் என்று. ஏன்னா உள்ள சுளையே இருக்காது, மாட்டுக்கு மட்டும் ஒரே கோதா இருக்கும்.  இந்த பிரச்சனை இனி ஏற்ப்படாம இருக்கனுமா இந்த பதிவை படிங்க. பழத்த வெட்டாமலே உள்ள இருக்கறது எத்தனை சுளை என்று எண்ணிவிடலாம். 

உங்க கேள்வி புரியுது, அதுக்காக மார்க்கெட்டுக்கு அல்ட்ரா ஸ்கேனிங்க தூக்கிட்டு போகவா முடியுங்கற தங்கள் கேள்வி எனக்கு காதுல விழுது, அதுல்லாம் வேணாம், சின்ன கணக்குதான்... உங்களாலயும் இனி சுளை எத்தனை உள்ள இருக்குன்னு கண்டு புடிச்சிடலாம்...

பலா பழத்தினை வெட்டாமலேயே, அதிலுள்ள சுளைகளின் எண்ணிக்கையை காண, பழம்பெரும் கணித நூலான, கணக்கதிகாரத்தில் ஒரு பாடல் உள்ளது.

"பலாவின் சுளையறிய வேண்டுதிரேல் ஆங்கு

சிறுமுள்ளுக் காம்பருக் கெண்ணி –வருவதை

ஆறிற் பெருக்கியே ஐந்தினுக் கீந்திடவே

வேறெண்ண வேண்டாஞ் சுளை"

உரை: ஒரு பலாப்பழத்தை அறுப்பதற்கு முன்பு அதிலுள்ள சுளைகள் இவ்வளவென்று கண்டுபிடிக்கலாமோ எனின் அதற்குச் சொல்லுமாறு: காம்பைச் சுற்றிலும் எண்ணிப் பார்க்க, ௱ முள்ளுக் கண்டது. இதை ௬ ஆல் பெருக்க, ௱ X ௬ = ௬௱ , இத ௫-க்கீய, ௱ X ௫ = ௫௱, ௨௰ X ௫ = ௱, ஆக ௱ ஐயும் ௨௰ ஐயும் கூட்ட ஈவு ௱௨௰ சுளை என்று சொல்வது.

விளக்கம்:

பலாப்பழத்தின் காம்புக்கு அருகில் உள்ள சிறு முட்களை எண்ணிக்கையை 6 ஆல் பெருக்கி வரும் விடையை 5 ஆல் வகுக்க கிடைக்கும் ஈவானது பழத்தினுள் உள்ள சுளைகளின் எண்ணிக்கையாகும்.

அதாவது,

பலா பழத்திலுள்ள முற்களின் எண்ணிக்கை : 100

இதை 100 X 6 = 600,

பின்பு இந்த 600 ஐ 5 ஆல் வகுக்க, 120.  இதுவே சுளையின் எண்ணிக்கையாகும்.

ஆக, காம்பைச் சுற்றி 100 முற்கள் இருந்தால் பழத்தில் 120 சுளைகள் இருக்கும்...!

அடுத்த முறை கண்டிப்பாக அனைவரும் பலா பழத்தை வாங்குறதுக்கு முன்னாடி கணக்கு போட்டுட்டு சுளைக்கு ஏற்ற காச கொடுங்க... அதிகமா கொடுத்து ஏமாற வேணாம். யாராவது இந்த கணக்க போட்டீங்கன்னா சரியா வருதான்னு மறக்காம சொல்லுங்கள்.

தங்கள் கருத்துகளை மறக்காமல் கமென்ட்டில் சொல்லிவிட்டுச் செல்லுங்கள்...

வெற்றிவேல்...

சாளையக்குறிச்சி..