என்தன் வீட்டுச் சிட்டே

 

எங்கள் வீட்டில்

எங்களோடு வாழும் 

அழகிய சிட்டே!

நலம் தானே?

நீ மட்டும் எங்கு கற்றுக் கொண்டாய்

நீங்காத மகிழ்வாய் இருக்க?

என்தன் வீட்டுக் கூரையில் தங்கியிருக்கும் 

அழகிய சிட்டே!

கார் காலத்தில் மழை நீர்

ஒழுகாத இடத்தையும்,

குளிர் காலத்தில் நடுங்காமலும்

வேனிற் காலத்தில் 

வெயில் படாத 

இடத்தையும் நீ மட்டும் எப்படி கண்டு கொண்டாய்!!!

என்தன் கோட்டையில் 

எனக்குத் தெரியாத ரகசியத்தை 

நீ அறிந்து வைத்துள்ளாய்!!!

சூட்சமகார சிட்டே!!!

வருஷம் ஏழாச்சு கூரைக்கு 

வாங்கிப் போட்ட

சருகும்  சருகா மக்கிப் போச்சு

காவட்டையும் மாடு மிதிச்சே 

நொறுங்கிப் போச்சு..

கூரைய பிரிச்சா உன் 

கூடு கலையும்,

உன் முட்டை உடையும்

நீ தெருவுக்கு வருவன்னு

ஆறு வருசமா காத்திருக்கேன்

நீயே போவேன்னு!!!

சொந்தம் இருந்தா

ரெண்டு நாளைக்கு போயிட்டு வாயேன்!!!

அதுக்குள்ள முடிஞ்சா வரைக்கும்

ஓட்டைக் கூரைய வேய்ந்துடறேன்.

இல்ல  ஒட்டுப் பண்ணை வைத்துடறேன்...

அடுத்த மாசம் ஐப்பசி

அடைமழையும் வந்துடும்.

வீடு  பூரா ஒழுகிடுமே, உந்தன் 

கூடும் நனைந்திடுமே,

ரெண்டு நாள் போயிட்டு வாயேன்.

அதுக்குள்ள சரி பண்ணிடறேன்

அடை மழைக்கு முன்

 நீ வாழும் கோட்டையை...

                                வெற்றிவேல்...